Baydenin "məxfi sənədlər" məsələsi səngimək bilmir - Konqres tələb edir ki...

Konqres Blinkendən Baydenin “məxfi sənədlər” məsələsindəki roluna aydınlıq gətirməsini istəyir.

Publika.az “TASS”a istinadən xəbər verir ki, ABŞ-ın Nümayəndələr Palatasının Xarici Əlaqələr Komitəsinin sədri Maykl Makkal dövlət katibi Entoni Blinkendən ABŞ prezidenti Co Baydenin məxfi sənədlərlə səhv rəftarına aydınlıq gətirməsini tələb edib.

Konqresmenin müvafiq məktubu çərşənbə axşamı komitənin mətbuat xidməti tərəfindən dərc edilib.

Konqresmen, həmçinin, Dövlət Katibindən Dövlət Departamentinin digər yüksək rütbəli rəsmilərinin Pensilvaniya Universitetinin dəstəyi ilə açılan Baydenlə əlaqəli Vaşinqton beyin mərkəzində işlədikləri müddətdə Çin hakimiyyəti ilə əlaqələrini və təmaslarını aydınlaşdırmasını tələb edir.

Konqresmen xatırladır ki, Blinken vaxtilə bu mərkəzdə çalışıb.

“Komitə məxfi məlumatların düzgün işlədilməməsi ilə bağlı təhlükələrdən xəbərdardır. Bu məsələ ciddi narahatlıq doğuran məsələdir”, - deyə Makkal məktubunda qeyd edib.

Xatırladaq ki, yanvar ayında Baydenlə əlaqəli mərkəzin binasında bir qrup məxfi sənədlərin tapıldığı məlum olub. Sənədlər onun ABŞ-ın vitse-prezidenti vəzifəsində işlədiyi dövrə aiddir.

Ağ Evin məlumatına görə, sənədlər 2022-ci ilin noyabrında dövlət başçısının vəkilləri tərəfindən aşkar edilib.

Daha sonra ABŞ prezidentinin Delaver ştatının Wilmington şəhərindəki evində də məxfi sənədlər tapılıb.

Mehti Kamiloğlu