ABŞ

Vaşinqton Tramp dövründə Paris iqlim sazişindən yenidən çıxacaq

9 Noyabr 2024 09:15

ABŞ Respublikaçı Donald Trampın dövründə 2015-ci il Paris iqlim sazişindən yenidən çıxa bilər.

Publika.az xəbər verir ki, bu barədə "New York Times" öz mənbələrinə istinadən məlumat yayıb.

Qeyd olunub ki, Trampın keçid komandası artıq iqlim və enerji sahələrində bir neçə icra sərəncamı hazırlayıb. Onlar ABŞ-ın Paris iqlim sazişindən çıxmasını və ölkənin qərbində neft hasilatının miqyasını artırmağa imkan verən qorunan təbii ərazilərin azaldılmasını nəzərdə tutur. Bundan əlavə, Ətraf Mühitin Mühafizəsi Agentliyinin qərargahının və onun 7 min əməkdaşının Vaşinqtondan başqa şəhərə köçürülməsi müzakirə edilir.

Xatırladaq ki, Tramp dəfələrlə qlobal istiləşmə anlayışının elmi əsaslılığına şübhə etdiyini bildirib. O, 2017-ci ildə ABŞ-ı Paris iqlim sazişindən çıxarıb. 2021-ci ilin yanvarında Cozef Bayden ABŞ prezidenti olanda Vaşinqtonu Paris razılaşmasına qaytaran fərman imzalayıb.