Ağ Evdə milyarderlər arasında gərginlik: Bir-birinin üstünə qışqırdılar

ABŞ Hökumətinin Səmərəliliyi Departamentinin (DOGE) rəhbəri İlon Mask və maliyyə naziri Skott Bessent ölkənin vergi xidməti ilə bağlı mübahisə zamanı Ağ Evdə bir-birinin üstünə qışqırıblar.

Publika.az xəbər verir ki, bu barədə “Axios” mənbələrə və şahidlərə istinadən məlumat yayıb.

Məlumata görə, şiddətli mübahisə ötən həftə ABŞ Prezidenti Donald Tramp və digər rəsmilərin qarşısında baş verib.

Nəşr yazır ki, onlar arasında ölkənin vergi xidmətinə kimin rəhbərlik edəcəyi ilə bağlı fikir ayrılığı yaranıb.

Bessent DOGE-nin büdcəyə böyük miqdarda pul qazandıracağına dair verdiyi vədləri yerinə yetirmədiyi üçün Maskı tənqid edib. Mask cavab olaraq maliyyə nazirini “Sorosun agenti” adlandırıb.

Daha sonra nazir “lənət olsun” deyə qışqırıb, Mask isə “Daha yüksək səslə de”, - deyə Bessenti qızışdırıb. Onların mübahisəsi o qədər ciddi olub ki, Trampın köməkçilərindən biri hər iki şəxsi sakitləşdirməyə çalışıb.

Baş verənləri həmin gün Ağ Evdə olan İtaliyanın Baş naziri Giorgia Meloni də eşidib.

Baş verənlərin Maskın şəxsiyyətinin və üslubunun Tramp administrasiyasının bəzi yüksək vəzifəli məmurlarını nə qədər qıcıqlandırdığının göstəricisi olduğu qeyd edilir.

Qeyd edək ki, Mask Bessent təyin olunmazdan əvvəl Hovard Lutnikin xəzinədarlıq katibi təyin edilməsini təklif edib və o, sonda Ticarət Departamentinin rəhbəri olub.