ABŞ-dan İrana qarşı “İraq gedişi” - Nağd dollar axını dayandırıldı

ABŞ İraqın nağd dollar tədarükünü dayandırıb və Bağdadla təhlükəsizlik sahəsindəki əməkdaşlığı dondurub.

Publika.az "The Wall Street Journal" (WSJ) nəşrinə istinadla xəbər verir ki, Vaşinqtonun bu addımı İranla qonşu olan ölkəyə qarşı ciddi təzyiq rıçaqı hesab olunur.

Mənbələr iddia edir ki, ABŞ Maliyyə Nazirliyi Nyu-York Federal Ehtiyat Bankındakı hesablardan 500 milyon dolların göndərilməsini İranla müharibə başlayandan bəri artıq ikinci dəfədir dondurur. Nəşrin yazdığına görə, Vaşinqtonun bu hərəkətləri İraq rəhbərliyinə təzyiqi artırmaq və ölkədəki yerli iranpərəst hərbi birləşmələrin buraxılmasını təmin etmək məqsədi daşıyır.

Qəzet vurğulayıb ki, 2003-cü ildə ABŞ-ın İraqa müdaxiləsindən sonra İraqın neft satışından əldə etdiyi bütün gəlirlər Nyu-York Federal Ehtiyat Bankında saxlanılır. Vaşinqton buna bənzər addımı 2015-ci ildə də atmışdı; o zaman ABŞ vəsaitlərin bir hissəsinin İŞİD terror təşkilatının əlinə keçə biləcəyindən ehtiyat edirdi.

Hüseyn İbadlı