Maduronun taleyinə mərc edən ABŞ hərbçisi saxlanıldı - 400 min dollar udmuşdu

ABŞ Ədliyyə Nazirliyi xüsusi əməliyyat qüvvələrinin hərbçisi Qannon Ken Van Daykı həbs edib. O, Venesuela prezidenti Nikolas Maduronun ələ keçirilməsi ilə bağlı məxfi məlumatlardan istifadə edərək proqnoz platforması "Polymarket" üzərindən mərc oynamaqda ittiham olunur.

Publika.az xarici KİV-ə istinadla xəbər verir ki, istintaq materiallarına görə, Donald Trump Maduronun “Mütləq qətiyyət” əməliyyatı çərçivəsində tutulduğunu elan etməzdən bir neçə gün əvvəl Van Dayk ABŞ-ın Venesuelaya müdaxiləsi və Maduronun hakimiyyətdən getməsi ilə bağlı dörd hadisəyə ümumilikdə 33 933 dollar mərc edib. Onun ən böyük mərci - Maduronun 31 yanvara qədər postunu tərk edəcəyi ehtimalına qoyduğu 32 537 dollar - 1242% gəlir gətirərək 404 222 dollara yüksəlib.

İş materiallarında yer alan fotoda Van Daykın "USS Iwo Jima" gəmisinin göyərtəsində olduğu görünür. Bildirilir ki, Maduro məhz həmin gəmi ilə daşınıb.

Mediada şübhəli mərc məlumatları yayıldıqdan sonra təqsirləndirilən şəxs izləri itirməyə çalışıb - "Polymarket" hesabını silib və kriptovalyuta cüzdanında e-poçt ünvanını dəyişib.

Van Dayka qarşı məxfi məlumatlardan qanunsuz istifadə, qiymətli kağızlar və əmtəələrlə bağlı fırıldaqçılıq, həmçinin elektron rabitə vasitələri ilə dələduzluq ittihamları irəli sürülüb.

Qeyd olunur ki, bu, ABŞ tarixində proqnoz bazarlarında insayder ticarətinə görə açılan ilk cinayət işidir.

"Polymarket" platforması şübhəli əməliyyatlar barədə məlumatı özü ABŞ Ədliyyə Nazirliyinə ötürüb. Donald Tramp məsələni şərh edərkən Van Daykı öz komandasına mərc etdiyi üçün cəzalandırılan beysbolçu Pit Rouz ilə müqayisə edib və “təəssüf ki, bütün dünya kazinoya çevrilib”, - deyə bildirib.

Müəllif: Adəm