Tramp atəş açan şəxsin saxlanıldığını AÇIQLADI

ABŞ Prezidenti Donald Tramp Vaşinqtondakı tədbirdə atəş açan şəxsin saxlanıldığını bildirib.

Publika.az xəbər verir ki, o, bu barədə özünün "Truth Social" sosial şəbəkəsindəki səhifəsində yazıb.

"Vaşinqtonda çətin bir axşam idi. Məxfi Xidmət və hüquq-mühafizə orqanları fantastik iş gördülər. Onlar sürətli və cəsarətli hərəkət etdilər", - deyə Ağ Ev rəhbəri yazıb.

Tramp qeyd edib ki, atəş açan şəxs saxlanıldıqdan sonra tədbirin davam etdirilməsini tövsiyə edib, lakin bu məsələdə tamamilə hüquq-mühafizə orqanlarının göstərişlərinə uyğun hərəkət edəcəyini vurğulayıb. Amerika liderinin sözlərinə görə, bununla bağlı qərar yaxın vaxtlarda veriləcək.

Xatırladaq ki, bir qədər əvvəl jurnalist Keytlin Kollinz "CNN" efirində Məxfi Xidmət əməkdaşlarının Donald Trampın iştirak etdiyi tədbirdə atışma törədən şəxsi zərərsizləşdirdiyini (öldürdüyünü) bildirmişdi. Hazırda rəsmi məlumatlarda ziddiyyətli məqamların dəqiqləşdirilməsi gözlənilir.

xxx

ABŞ Məxfi Xidmətinin əməkdaşları Prezident Donald Trampın iştirak etdiyi tədbirdə atəş açan şəxsi zərərsizləşdiriblər.

Publika.az xəbər verir ki, bu barədə jurnalist Keytlin Kollinz "CNN" telekanalının efirində məlumat verib.

Hadisə ABŞ prezidentinin iştirakı ilə Ağ Evin Müxbirlər Assosiasiyasının ziyafətinin keçirildiyi "Washington Hilton" otelində baş verib. Jurnalist bildirib ki, hazırda yanında olan təhsil nazirinin mühafizə xidməti otelin lobbisində atəş açan şəxsin olduğunu və onun öldürüldüyünü təsdiqləyib.

Xatırladaq ki, Trampın Vaşinqtondakı tədbirdən təxliyəsi zamanı Məxfi Xidmət əməkdaşları atəş açıldığı barədə xəbərdarlıq etmişdilər. Zaldakı qəribə səs-küy və bir neçə şaqqıltı səsindən sonra görüş yarımçıq kəsilmiş, iştirakçılardan ərazini tərk etmək xahiş olunmuşdu. Həmin vaxt Ağ Ev rəhbərinin olduğu səhnəyə silahlı agentlər çıxaraq onu dərhal uzaqlaşdırmışdılar.

Hüseyn İbadlı