Tramp Ukraynanı unutdu: Ağ Evdə diqqət bu ölkəyə yönəldi

ABŞ prezidenti Donald Trampın administrasiyasında Ukrayna böhranı arxa plana keçməyə başlayıb. Administrasiyanın yüksək rütbəli rəsmiləri artıq Ukrayna ilə bağlı sonuncu müzakirənin nə vaxt aparıldığını xatırlamaqda çətinlik çəkirlər.

Publika.az xəbər verir ki, bu barədə "Politico" nəşri Ağ Evdəki mənbələrinə istinadən məlumat yayıb.

Bildirilir ki, Yaxın Şərqdə gərginliyin artması Vaşinqtonun diqqətini tamamilə bu bölgəyə yönəldib. Adı açıqlanmayan yüksək rütbəli rəsmi bildirib ki, hazırda İran mütləq şəkildə əsas fokus nöqtəsinə çevrilib.

Nəşrin mənbələri qeyd edir ki, Trampın Ukrayna üzrə əsas sözçüsü hesab olunan Yaxın Şərq üzrə xüsusi nümayəndə Stiven Uitkoff və prezidentin kürəkəni Cared Kuşner hazırda demək olar ki, bütün vaxtlarını İran məsələsinə sərf edirlər. Baxmayaraq ki, hər iki şəxs Moskva və Kiyevlə məhdud formatda əlaqələri saxlayır, onların əsas fəaliyyət istiqaməti dəyişib.

Trampın Ukrayna münaqişəsinə marağının azalmasının digər bir səbəbi isə Avropa ölkələri ilə münasibətlərin pisləşməsidir. Belə ki, Avropa dövlətlərinin İrana qarşı hərbi əməliyyatlarda və Hörmüz boğazının blokadadan çıxarılmasında ABŞ-a dəstək verməməsi Trampın narazılığına səbəb olub.

Buna baxmayaraq, xəbərdə vurğulanır ki, Ukrayna böhranının nizamlanması hələ də Tramp üçün vacib prioritetlərdən biri olaraq qalır, lakin Yaxın Şərqdəki alov bu prioriteti kölgədə qoyub.

Müəllif: Adəm