ABŞ səfirliklərinə görün hansı göstəriş verildi

ABŞ hakimiyyəti digər dövlətlərə Hörmüz boğazından naviqasiya azadlığına zəmanət vermək məqsədi daşıyan yeni beynəlxalq koalisiyanın tərkibinə daxil olmaq barədə təklif göndərib.

Publika.az xəbər verir ki, bu barədə məlumatlı mənbələrə istinadən "The Wall Street Journal" (WSJ) qəzeti məlumat yayıb.

Məlumata görə, Dövlət Departamenti ABŞ-ın xaricdəki diplomatik nümayəndəliklərinə dəniz gəmiçiliyi sahəsindəki yeni təşəbbüs haqqında materiallar göndərib. Diplomatlara xarici ölkələrin hökumətlərini onu dəstəkləməyə inandırmaq tapşırılıb.

Nəşrin yazdığına görə, koalisiya iştirakçılar arasında kəşfiyyat məlumatlarının mübadiləsinə, diplomatik fəaliyyətlərin koordinasiyasına və sanksiya rejiminin icrasına nəzarət edilməsinə kömək etmək məqsədi daşıyır.

Xatırladaq ki, martın ortalarında ABŞ Prezidenti Donald Tramp anoloji çağırışla çıxış etmişdi. O, bu strateji su yolu vasitəsilə həyata keçirilən neft tədarükündən asılı olan dövlətlərin ticarət gəmilərinin maneəsiz keçidinə kömək etməyə borclu olduqlarını bildirmişdi. Tramp xüsusən Böyük Britaniya, Çin, Cənubi Koreya, Fransa və Yaponiyadan dəstək gözlədiyini ifadə etmişdi. Lakin Vaşinqtonun ilkin təşəbbüsü lazımi dəstək almamışdı.