Bunkerlər ABŞ-ın HƏDƏFİNDƏ - Yeni nüvə silahları yaradılacaq

ABŞ Energetika Nazirliyi növbəti maliyyə ili üçün büdcəyə nüvə başlıqlı yeni bunker əleyhinə bombanın hazırlanması məqsədilə vəsait daxil edilməsini xahiş edib.

Publika.az xəbər verir ki, bu barədə The War Zone (TWZ) portalı mənbələrə istinadla məlumat yayıb.

Nəşrin məlumatına görə, söhbət bunkerləri və digər yeraltı obyektləri məhv etmək üçün nəzərdə tutulmuş "Nuclear Deterrent System-Air-delivered" sistemindən gedir. Qurum layihə üzərində işləmək üçün təxminən 100 milyon dollar almağı planlaşdırır.

TWZ xatırladır ki, ABŞ Silahlı Qüvvələrinin arsenalında olan yeganə nüvə aviabombası B61-11-in döyüş hissəsinin gücü 340-dan 400 kilotonna qədərdir.

Bundan əvvəl Pentaqon rəhbəri Pit Heqset bildirmişdi ki, idarə ölkənin nüvə triadasını modernləşdirmək üçün nüvə silahlarının və döyüş başlıqlarının çatdırılma sistemlərinin sınaqlarını keçirmək niyyətindədir. Onun rəhbərlik etdiyi qurum bu yaxınlarda 2027-ci ildə ABŞ-ın nüvə kompleksinin maliyyələşdirilməsi üçün büdcənin artırılmasını istəyib.

Hüseyn İbadlı