ABŞ-da edamla bağlı YENİ QƏRAR - Bu üsul tətbiq ediləcək

ABŞ Ədliyyə Nazirliyi edam cəzasının icrası üçün güllələnmə üsuluna rəsmi şəkildə icazə verib.

Publika.az xəbər verir ki, bu barədə "Associated Press" məlumat yayıb.

Bildirilir ki, bu qərar Donald Tramp administrasiyasının federal məhkumlar üçün ölüm hökmlərinin icrasını sürətləndirmək planı çərçivəsində qəbul edilib.

Məlumata əsasən, nazirlik həmçinin edam üçün istifadə olunan pentalbarbital preparatının tətbiqini də yenidən bərpa edir. Bu dərman Trampın birinci prezidentlik dövründə 13 edamda istifadə olunmuşdu.

Co Bayden administrasiyası dövründə isə pentalbarbital federal edam protokolundan çıxarılmışdı. Səbəb isə onun məhkumlara həddindən artıq ağrı verə biləcəyi ilə bağlı narahatlıqlar idi. İndi isə Ədliyyə Nazirliyi hər iki üsulu yenidən gündəmə qaytarır.

Qeyd edək ki, 2025-ci ilin avqustunda Donald Tramp ağır cinayətlərə görə Vaşinqtonda (Kolumbiya dairəsi) edam cəzasının tətbiqinin genişləndirilməsini dəstəklədiyini bildirmişdi.

Xatırladaq ki, bu bölgədə edam cəzası 1981-ci ildən ləğv edilib.

Müəllif: Adəm