Trampın adı bu binadan silinəcək

Vaşinqton Federal Məhkəməsi ABŞ paytaxtının ən böyük teatr-konsert kompleksinin adının dəyişdirilməsinə qadağa qoyub.

Publika.az xəbər verir ki, dairə federal hakimi Kristofer Kuperin bununla bağlı verdiyi qərar gündəm olub.

Belə ki, bu qərarla ABŞ Prezidenti Donald Trampın adı həmin kompleksdən silinəcək. Qərara əsasən, Trampın adının çəkildiyi bütün yazıların iki həftə ərzində sökülməsi tələb olunur. Məhkəmə müəyyən edib ki, idarəedicilər şurası Kennedi Mərkəzinə prezident Trampın adını müstəqil şəkildə verməklə öz səlahiyyətlərini aşıb. Kennedi Mərkəzinə bu ad konqres tərəfindən verilib və onu dəyişmək hüququ yalnız konqresə məxsusdur.

Xatırladaq ki, kompleksin adı 2025-ci il dekabrın 18-dən etibarən rəsmi olaraq Con Kennedi və Donald Tramp adına İfaçılıq İncəsənəti Mərkəzi kimi dəyişdirilərək özündə iki ABŞ prezidentinin adını birləşdirib.

ABŞ-ın bir neçə tarixi və memarlıq təşkilatı həm ad məsələsi, həm də kompleksin iyul ayında təxminən iki il müddətinə təmir üçün bağlanması planı ilə bağlı mart ayında kompleksin idarəedicilər şurasına qarşı iddia qaldırıb. İddiaçılar müdafiə tərəfinin ABŞ Konqresinin icbari razılığını almadan və müəyyən edilmiş federal yoxlama prosedurlarını pozaraq hərəkət etdiyini irəli sürüblər.