Tramp İrandan güzəştlərin yazılı təsdiqini tələb edir

ABŞ Prezidenti Donald Tramp Vaşinqton və Tehran arasında əldə olunmuş ilkin razılaşma çərçivəsində İranın nüvə məsələləri ilə bağlı yazılı zəmanət verməsini tələb edir.

Publika.az xəbər verir ki, bu barədə "ABC News" telekanalı məlumatlı mənbələrə istinadla məlumat yayıb.

Bildirilib ki, İran nümayəndələri şifahi şəkildə nüvə proqramları ilə bağlı bir sıra şərtlərə razı olduqlarını bildiriblər. Lakin Ağ Evin Situasiya otağında keçirilən iclas zamanı Tramp bu şifahi zəmanətləri qeyri-kafi hesab edib.

ABŞ və İran arasındakı danışıqların əsas mövzusu atəşkəs rejimini rəsmən uzatmalı, Hörmüz boğazının tədricən açılmasını təmin etməli və İranın nüvə proqramı ilə bağlı gələcək müzakirələr üçün vaxt çərçivəsi müəyyən etməli olan qarşılıqlı anlaşma memorandumudur.

İyunun 1-də İranın "Tasnim" agentliyi yazıb ki, İsrail Livandakı hərbi əməliyyatlarını dayandırmayana və öz qoşunlarını ölkə ərazisindən çıxarmayana qədər İran ABŞ-la danışıqları bərpa etməyəcək.

Hüseyn İbadlı