Avropadan qırıcıları və hərbi qüvvələri çıxarın! - Tramp əmr verdi

ABŞ administrasiyası NATO əməliyyatları üçün Avropada yerləşdirilən hərbi qüvvələrinin əhəmiyyətli hissəsini ixtisar etməyə hazırlaşır.

Publika.az xəbər verir ki, bu barədə "The New York Times" qəzeti ABŞ-ın daxili sənədinə istinadən məlumat yayıb.

Məlumata görə, Vaşinqton Avropadakı qırıcı təyyarələrinin və hərbi dəniz qüvvələrinin sayını azaltmağı planlaşdırır. ABŞ müttəfiqlərinə təqdim edilən planlara əsasən, bölgədə yerləşdirilən F-16 və F-15E qırıcılarının sayı təxminən 150-dən 100-ə endiriləcək.

Dəyişikliklər yalnız döyüş aviasiyasını əhatə etmir. Belə ki, dəniz kəşfiyyatı təyyarələrinin sayı 26-dan 15-ə qədər azaldılacaq. Bundan əlavə, ABŞ regionda yerləşən səkkiz yanacaq dolduran təyyarəsini də başqa ərazilərə köçürməyi nəzərdən keçirir.

Plan çərçivəsində onlarla qırıcı təyyarəni özündə birləşdirən aviadaşıyıcı zərbə qrupunun və raketlərlə təchiz edilmiş sualtı qayığın da Avropadan çıxarılması müzakirə olunur.

ABŞ Müdafiə Nazirliyi məsələ ilə bağlı şərh verməkdən imtina edib.

Adəm