Vaşinqton İranın aktivləri ilə bağlı xəbərləri yalanladı

ABŞ rəsmiləri İranın 12 milyard dollarlıq dondurulmuş aktivlərinin geri qaytarılması ilə bağlı yayılan məlumatları təkzib edib.

Publika.az xəbər verir ki, bu barədə "Axios" portalının jurnalisti Barak Ravid sosial şəbəkədəki hesabında mənbələrinə istinadla məlumat yayıb.

O bildirib ki, bu məlumatlar həqiqəti əks etdirmir.

Onun sözlərinə görə, bu, nəticəyə əsaslanan bir sövdələşmədir və iranlılar öz öhdəliklərini yerinə yetirməyənə qədər heç bir dondurulmuş vəsait açılmayacaq.

Bundan əvvəl ABŞ-ın İranla razılaşma çərçivəsində 24 milyard dolları dondurulmaqdan çıxaracağı barədə məlumatlar yayılmışdı. İyunun 12-də axşam saatlarında isə ABŞ-ın vitse-prezidenti Cey Di Vens İranın aktivlərinə qoyulan sanksiyaların götürülməsi ilə bağlı şayiələri təkzib edərək, respublikanın heç bir nağd vəsait almayacağını və sadəcə sazişin imzalanmasına görə maliyyə resurslarının boşaldılmayacağını bildirib.

Fevralın 28-də ABŞ və İsrail İrana qarşı hərbi əməliyyata başlayıb. Tramp xalqa müraciətində bu zərbələri Tehranın nüvə ambisiyalarından imtina etmək istəməməsi səbəbindən "səbrin tükənməsi" ilə izah edib. Cavab olaraq İran İsrailə və Yaxın Şərqdəki Amerika aviabazalarına raket və dronlarla zərbələr endirib.

Hüseyn İbadlı