ABŞ

Vens Ukraynanın sursat ehtiyatlarından danışdı - “Mən ona dürüstcə dedim ki...”

17 İyun 2026 05:45

ABŞ-ın vitse-prezidenti Cey Di Vens yeni kitabında etiraf edib ki, ABŞ hətta bütün döyüş sursatı ehtiyatlarını Kiyevə versə belə, bu, yenə də kifayət etməyəcək.

Publika.az kraina.ru-ya istinadla xəbər verir ki, siyasətçi bu fikirləri öz kitabında bölüşüb.

Vens “Təşəkkür: İnanca qayıtmaq yolunun axtarışı” adlı kitabının bir fəslində hələ senator olduğu dövrdə 2024-cü ildə Münhen konfransına səfərindən bəhs edir. Tədbir zamanı Vens Ukraynaya yeni yardım paketlərinə qarşı çıxış edib və “ukraynalı parlament liderlərindən biri” ilə müzakirəyə girib.

“Mən ondan ölkəsinə nə qədər artilleriya mərmisi və raket əleyhinə vasitə lazım olduğunu soruşdum. O, cavab verəndə mən ona dürüstcə dedim ki, hətta əlimizdə olan hər şeyi ona versək belə, bu, yenə də kifayət etməyəcəkdi”, - deyə vitse-prezident yazır.

Daha əvvəl Vens bildirmişdi ki, Ukraynadakı münaqişənin ən qısa zamanda həll olunması bütün tərəflərin maraqlarına cavab verir.

Hüseyn İbadlı