Beşulduzlu hotel, qızılı detallar və dəbdəbə: Tramp yeni təyyarəsini təqdim etdi - FOTO

ABŞ prezidenti Donald Tramp yeni prezident təyyarəsini - yenilənmiş "Air Force One"ı rəsmi şəkildə təqdim edib. 400 milyon dollar dəyərində olan "Boeing 747-8" ilk uçuşunu həyata keçirərək Trampı Vaşinqtondan Şimali Dakotaya aparıb.

Publika.az xəbər verir ki, təyyarə Qətər hökumətinin hədiyyəsi olub və Trampın şəxsi zövqünə uyğun şəkildə tamamilə yenidən dizayn edilib.

Beşulduzlu hoteli xatırladan salon

Yeni "Air Force One"ın interyeri maksimum komfort üçün hazırlanıb. Təyyarədəki iri kreslolar tam uzanaraq çarpayıya çevrilir, masaj funksiyası ilə təchiz olunub. Hər sərnişin üçün ayrıca ekran quraşdırılıb və burada həm kabel televiziyası, həm də Apple TV üzərindən müxtəlif platformalara baxmaq mümkündür.

Yeni layner əvvəlki prezident təyyarəsindən daha böyükdür. Onun uzunluğu 6 metr, qanadlarının açılımı isə 9 metr artıqdır. Təyyarənin gövdəsində istifadə olunan mavi, qırmızı, ağ və qızılı rənglərin seçimini də şəxsən Tramp edib.

Qızılı detallar və jurnalistlərə qadağa

İnteryer açıq pastel tonlarda hazırlanıb. Bej rəngli xalçalar, krem rəngli dəri divanlar və Trampın sevdiyi qızılı örtüklü işıqlandırma elementləri təyyarəyə xüsusi dəbdəbə verir.

Prezident jurnalistlərinə salonun tam görüntülərini çəkməyə icazə verilməyib. Onlara yalnız oturacaqlardakı ad nişanlarını və ilk uçuş zamanı təqdim olunan səhər yeməyini - vetçina və pendirli sendviç, draqonfrutlu salat, eləcə də Tramp imzalı M&M's konfetləri və xüsusi qablaşdırılmış şokoladları lentə almağa icazə verilib.

"Ölkə bu təyyarə ilə fəxr etməlidir. Bu, sadəcə möhtəşəmdir", - deyə Tramp uçuşdan əvvəl jurnalistlərə bildirib.

Qətərin hədiyyəsi Vaşinqtonda mübahisə yaratdı

Qətərin ABŞ prezidentinə belə bahalı təyyarə hədiyyə etməsi Vaşinqtonda ciddi müzakirələrə səbəb olub. Tənqidlərə cavab verən Tramp bildirib ki, təyyarə ABŞ-a çox yaxşı münasibət göstərən bir ölkədən alınıb.

Xaricdə istehsal edildiyi üçün təyyarənin təhlükəsizliyi ilə bağlı da suallar yaranıb. Lakin Ağ Ev administrasiyasının yüksəkvəzifəli nümayəndəsi laynerin xüsusi xidmət orqanları tərəfindən ciddi yoxlamadan keçirildiyini və ən müasir əks-kəşfiyyat, müdafiə və təhlükəsizlik sistemləri ilə təchiz olunduğunu açıqlayıb.

Məlumata görə, yeni "Air Force One" yaxın günlərdə Trampı Raşmor dağı yaxınlığındakı bayram tədbirlərinə aparacaq. Gələn həftə isə prezident NATO sammiti üçün Türkiyəyə, noyabrda isə APEC sammitində iştirak etmək məqsədilə Çinə bu təyyarə ilə səfər etməyi planlaşdırır.

Müəllif: Adəm