Tramp Xameneinin dəfn mərasimini izləyir - “Bəlkə də bu, saxta göz yaşlarıdır”

ABŞ Prezidenti Donald Tramp İranın keçmiş ali rəhbəri Əli Xameneinin dəfn mərasimini izləyir.

Publika.az xəbər verir ki, bu barədə "Axios" portalı öz mənbəyinə istinadla məlumat yayıb.

Ağ Ev rəhbərinin sözlərinə görə, ABŞ və İran Xameneinin dəfn mərasimi ilə bağlı tədbirlər başa çatana qədər danışıqlarda bir həftəlik fasilə vermək qərarına gəliblər.

Qeyd olunub ki, bəzi iranlıların dəfn mərasimində ağladığını görən Tramp təəccüblənib. Onun fikrincə, insanlar Xameneiyə nifrət edirdilər.

"Bəlkə də bu, saxta göz yaşlarıdır", - deyə nəşr Trampın sözlərini sitat gətirib.

İyulun 4-dən 6-dək Tehranda ayətulla ilə vida mərasimi keçirilir. İslam Respublikasının qurucusu İmam Xomeyni kompleksi kollektiv dua üçün insanları qəbul edəcək. İyulun 6-da İranın paytaxtında dəfn yürüşü keçiriləcək.

İyulun 7-də Xameneinin cənazəsi Quma çatdırılacaq, iyulun 8-də isə İraqın Kərbəla və Nəcəf şəhərlərində dəfn yürüşü təşkil olunacaq. Növbəti gün cənazə İrana qaytarılacaq və o, doğulduğu Məşhəd şəhərində dəfn ediləcək.

Xamenei fevralın 28-də ABŞ və İsrailin Tehrana endirdiyi zərbələr nəticəsində həlak olub. İranın yeni ali rəhbəri kimi onun oğlu Müctəba seçilib, lakin o, hələ də ictimaiyyət qarşısına çıxmayıb.

Hüseyn İbadlı