Trampın hərbi səlahiyyətləri məhdudlaşdırıla bilər - Səbəb İrandır

ABŞ prezidenti Donald Trampın İranla bağlı siyasəti Respublikaçılar Partiyası daxilində narahatlıq yaradıb. Bu səbəbdən partiya üzvlərinin Trampın ali baş komandan kimi hərbi səlahiyyətlərinin məhdudlaşdırılmasını dəstəkləyə biləcəyi bildirilir.

Publika.az xəbər verir ki, bu barədə "The Hill" nəşri məlumat yayıb.

Bildirilib ki, İranda atəşkəsin pozulacağı təqdirdə Trampın hərbi səlahiyyətlərini məhdudlaşdıran təşəbbüs Respublikaçılar arasında daha geniş dəstək qazana bilər.

Nəşr yazıb ki, Respublikaçılar Partiyasının bəzi üzvləri daha əvvəl də İranla bağlı müharibənin dayandırılmasına yönəlmiş qətnamələrin əleyhinə səs veriblər.

Bununla yanaşı, ABŞ Senatında yeni müdafiə büdcəsinin qəbulu ilə bağlı mümkün fikir ayrılıqlarından narahatlıq var. Pentaqon artıq əlavə 67,1 milyard dollar maliyyə ayrılmasını istəyib.

Qeyd edək ki, "War Cost Tracker" portalının hesablamalarına əsasən, Yaxın Şərqdə 108 gün davam edən silahlı qarşıdurma ABŞ vergi ödəyicilərinə 146,3 milyard dollardan çox vəsaitə başa gəlib.