Pentaqon 40 məxfi UNO faylını yayımladı - VİDEO

ABŞ Müdafiə Nazirliyi uçan naməlum obyektlərlə (UNO) bağlı yeni məlumatlar dərc edib.

Publika.az xəbər verir ki, bu barədə "CBS News" məlumat yayıb.

Nazirlik 40 məxfi faylı ictimaiyyətə açıqlayıb ki, bura 14 sənəd, 19 videoçarx, 4 audiofayl və 3 təsvir daxildir. Bunlar Pentaqon, ABŞ Energetika Nazirliyi, NASA, Mərkəzi Kəşfiyyat İdarəsi (MKİ), habelə Federal Təhqiqat Bürosu (FTB) tərəfindən hazırlanıb. Sənədlərdən birində 2015-ci ilin sentyabrında baş vermiş insidentin təfərrüatları açıqlanıb. Burada Texasdakı "Pantex" müəssisəsinin hava məkanına daxil olan naməlum obyektlə qarşılaşan iki zabitin ifadələri dərc olunub. Bununla yanaşı, digər bir sənəddə Atlantik okeanı, Sakit okeanın qərb hissəsi və Yaxın Şərq üzərindəki obyektlərin müşahidəsinə dair məlumatlar məxfilikdən çıxarılıb. Belə ki, sənəddə 2020-ci ildə Atlantik okeanı üzərində baş verən hadisə qeyd olunub. Hərbi Dəniz Qüvvələrinin ekipaj üzvünün hesabatına görə, naməlum obyekt "daha tünd, tünd-qırmızı rəngdə, hündürlüyü təxminən 12-15 fut (təqribən 3,5-4,5 metr) idi. O, böyük, bir qədər deformasiyaya uğramış hava şarına bənzəyirdi". Pentaqon UNO-lar haqqında ilk məlumatları mayın 8-də dərc etməyə başlayıb. Onların arasında 170 fotoşəkil, videoçarx və şahid ifadələri var idi. Daha sonra, mayın 22-də ABŞ hakimiyyəti yeni fayl blokunu açıqlayıb. Xüsusilə, hərbi idarə ABŞ Hərbi Hava Qüvvələrinə məxsus F-16 qırıcısının 2023-cü ildə Miçiqan ştatındakı Huron gölü üzərində naməlum obyekti vurduğu görüntüləri dərc edib.

Hüseyn İbadlı