Tramp Aİ-ni hədələdi - Cərimələri ləğv etməsəniz...

ABŞ Prezidenti Donald Tramp Amerika texnologiya şirkətlərinə tətbiq edilən böyük cərimələrdən sonra Vaşinqtonun Avropa İttifaqının (Aİ) siyasəti ilə bağlı araşdırmaya başlayacağını bildirib.

Publika.az xəbər verir ki, Amerika lideri "Truth Social"da etdiyi paylaşımda Brüsseli yeni rüsumlarla hədələyib.

Tramp iddia edib ki, Aİ əsassız olaraq "Apple"ı 15, "Meta"nı 3, "Amazon"u 2,5, "Google"u isə 1 milyard dollar cərimələyib. O, diqqətə çatdırıb ki, "Google"a tətbiq edilən cərimələrin ümumi məbləği 18 milyard dolları keçib.

"Biz Amerika şirkətlərinin və öz növbəsində, Amerika vergi ödəyicilərinin "soyğunçuluq" təcrübəsi ilə bağlı 301-ci maddəyə uyğun olaraq dərhal araşdırmaya başlayacağıq. Avropa İttifaqı bu qanunsuz və son dərəcə qeyri-etik davranışın nəticəsi ağır olacaq", - Tramp vurğulayıb.

ABŞ lideri onu da əlavə edib ki, Brüssel cərimələri tamamilə ləğv etməlidir, əks halda, Vaşinqton yaxın vaxtlarda Aİ-yə qarşı "əhəmiyyətli idxal rüsumları" tətbiq edəcək.