ABŞ Rusiyaya qarşı yeni sanksiyalara hazırlaşır: Tarix açıqlandı

ABŞ Konqresi Rusiyaya qarşı yeni sanksiyalar paketini bu ilin payızının əvvəlində qəbul edə bilər.

Publika.az xəbər verir ki, bunu Ukrayna prezidentinin sanksiya siyasəti üzrə nümayəndəsi Vladislav Vlasyuk "RBK-Ukrayna"ya açıqlamasında deyib.

Onun sözlərinə görə, bu həftə ABŞ Senatında qanun layihəsi üzrə yekun prosedur səsverməsi keçiriləcək. Bundan sonra sənəd sentyabrın əvvəlində Nümayəndələr Palatasına təqdim olunacaq. Palata layihəni təsdiqləyərsə, sənəd imzalanmaq üçün Ağ Evə göndəriləcək.

Xatırladaq ki, iyulun 28-də ABŞ Senatı ilk prosedur səsverməsində Rusiyaya qarşı yeni sanksiyaların tətbiqini dəstəkləyib.

Senator Lindsi Qremin iştirakı ilə hazırlanmış qanun layihəsinin əsas müddəalarından biri Rusiyadan neft və qaz alan ölkələrə qarşı ikinci dərəcəli rüsumların tətbiqini nəzərdə tutur. Yeni düzəlişlərə əsasən, əvvəllər təklif edilən 500 faizlik vahid tarif əvəzinə, ABŞ-la ticarət aparan və Rusiya enerji daşıyıcılarını ən çox idxal edən beş ölkəyə, həmçinin Vaşinqtonun sanksiyalardan yayınmağa yardım etdiyini düşündüyü beş dövlətə qarşı 100 faizə qədər gömrük rüsumu tətbiq oluna bilər. Çin və Hindistan da bu siyahıda yer alır.

Müəllif: Adəm