ABŞ-ın məxfi "51-ci Zona"sında GÜCLÜ YANĞIN

ABŞ Hərbi Hava Qüvvələrinin Nevada ştatında yerləşən və məxfi "51-ci Zona"nın da daxil olduğu hərbi poliqonda təbii yanğın baş verib.

Bu barədə Publika.az ABŞ Torpaqların İdarə Olunması Bürosunun məlumatına istinadla xəbər yayıb.

Yanğın artıq təxminən 54 kvadrat kilometr ərazini əhatə edib. Alov Linkoln dairəsində yerləşən Nevada Sınaq və Təlim Poliqonunun (NTTR) qapalı ərazisində ildırımın düşməsi nəticəsində başlayıb. Güclü külək, yüksək temperatur və aşağı rütubət yanğının sürətlə yayılmasına şərait yaradır.

Məlumata görə, bu cür hava şəraitinin avqustun 4-dək davam edəcəyi gözlənilir. Bu isə gün ərzində yanğının daha da güclənməsinə və ehtimal olunan ildırımlı leysanlar səbəbindən alovun yeni ərazilərə yayılmasına səbəb ola bilər.

"51-ci Zona" ABŞ Hərbi Hava Qüvvələrinə məxsus məxfi aviabazadır və çoxsaylı sui-qəsd nəzəriyyələrinin əsas mövzularından biri hesab olunur. O, Nevada səhrasında, Las-Veqas şəhərindən 134 kilometr məsafədə yerləşir.

Hüseyn İbadlı