Tramp HƏMAS-ın tərksilah ediləcəyini ELAN ETDİ

ABŞ Prezidenti Donald Tramp Fələstinin radikal HƏMAS hərəkatının tam tərksilahı ilə bağlı razılıq əldə olunduğunu bəyan edib.

Publika.az xəbər verir ki, o, bu barədə “Truth Social” sosial şəbəkəsində paylaşım edib.

"Bu gün Sülh Şurası HƏMAS-ın və Qəzza zolağında fəaliyyət göstərən bütün digər silahlı qruplaşmaların tam tərksilahına dair tarixi əhəmiyyətə malik razılıq əldə edib", – paylaşımda qeyd olunub.

Tramp bunu "dayanıqlı sülhün və təhlükəsizliyin təmin edilməsi istiqamətində atılmış nəhəng addım" adlandırıb.

İyulun 30-da Sülh Şurasının nümayəndəsi bildirmişdi ki, HƏMAS-ın tərksilahı planına Qəzza zolağındakı yeraltı tunellərin və silah anbarlarının məhv edilməsi daxildir. Onun sözlərinə görə, təşəbbüs hərəkat nümayəndələrinin Qəzzanın inzibati idarəetmə strukturlarında iştirakını nəzərdə tutmur.

İyulun 27-də HƏMAS Sülh Şurasının Qəzza zolağında nizamlanma ilə bağlı təqdim etdiyi planın indiyədək müzakirə olunan iki bəndini yerinə yetirməyə hazır olduğunu açıqlamışdı. Söhbət Fələstin anklavı üzrə nizamlanma planının 5-ci və 8-ci bəndlərindən gedir.

Planın 5-ci bəndi HƏMAS-ın silahlı birləşmələrinin mülki idarəetmə sistemindən, eləcə də mülki strukturlarda çalışan əməkdaşlardan ayrılmasını nəzərdə tutur.

8-ci bəndə əsasən isə HƏMAS-ın silahlı dəstələrinin tərksilahı prosesi mərhələli şəkildə və beynəlxalq nəzarət altında həyata keçirilməli, silahlar İsrailə deyil, Sülh Şurasının himayəsi və koordinasiyası altında fəaliyyət göstərəcək yeni Fələstin strukturlarına təhvil verilməlidir.

Hüseyn İbadlı