ABŞ-dan sərt viza qərarı - 20 min dollar tələb ediləcək

ABŞ Dövlət Departamenti 50 ölkənin vətəndaşları üçün məcburi olacaq uzunmüddətli viza depoziti proqramını rəsmi şəkildə təsdiqləyib.

Publika.az xəbər verir ki, bu barədə qurumun yaydığı bildirişdə qeyd olunub.

Dərc olunmuş sənədə əsasən, konsulluq xidmətləri qeyri-immiqrasiya vizası üçün müraciət edən şəxslərdən 20 min ABŞ dollarınadək maliyyə təminatı tələb etmək səlahiyyəti əldə edib.

Bu tədbir viza rejiminə əməl olunmasını və əcnəbi vətəndaşların ölkəni vaxtında tərk etməsini təmin etmək məqsədi daşıyır. Yeni qaydalar ilk növbədə B-1 və B-2 kateqoriyalı turist və işgüzar vizaların sahiblərinə şamil olunacaq.

Daimi sistemin tətbiqi 2025-ci ilin avqustunda istifadəyə verilmiş pilot layihənin davamı hesab olunur. Həmin eksperiment çərçivəsində depozit məbləği 5 min ABŞ dollarından 15 min ABŞ dollarınadək dəyişirdi. Sınaq mərhələsində proqram 50 ölkənin vətəndaşlarını əhatə edib ki, onlardan 30-u Afrika regionuna aiddir.

Yeni proqramın tam tətbiqinə 2026-cı il avqustun 3-də, müvafiq qərarın ABŞ Federal Reyestrində rəsmi dərc olunacağı tarixdə başlanılması planlaşdırılır.

Hüseyn İbadlı