Hamı Trampın həmin təyyarədə olduğunu zənn edirdi, sən demə... - İrana qarşı "yem" əməliyyatı

İyulun əvvəlində ABŞ Prezidenti Donald Tramp İrandan gələn mümkün sui-qəsd təhdidinə görə Türkiyədən gizli şəkildə çıxarılıb.

Publika.az xəbər verir ki, bu barədə "The Washington Post" ABŞ rəsmisinə istinadən məlumat yayıb.

Nəşrin məlumatına görə, hadisə iyulun 8-də NATO sammitindən sonra baş verib. Jurnalistlərin gözü qarşısında Trampın “Air Force One” prezident təyyarəsinə mindiyi nümayiş etdirilib. Lakin bir neçə dəqiqə sonra o, gizli şəkildə ABŞ Hərbi Hava Qüvvələrinə məxsus C-32A təyyarəsinə aparılıb.

C-32A adətən uçuşdan əvvəl ərzaq və digər zəruri ləvazimatların daşınması üçün istifadə olunur.

ABŞ rəsmisinin sözlərinə görə, bu addımdan sonra “Air Force One” İran üçün bir növ “yem” rolunu oynayıb. Bu əməliyyatdan Prezidentlə səfər edən jurnalistlərin, hətta bəzi Ağ Ev əməkdaşlarının da xəbəri olmayıb.

Mənbə bildirib ki, son 30 il ərzində ABŞ-da təyyarələrin bu cür dəyişdirilməsi ilə bağlı başqa hallar da baş verib.

“The Washington Post” yazır ki, ABŞ hökumətində İranın Tramp da daxil olmaqla, amerikalı siyasətçilərə qarşı terror planları hazırlaya biləcəyi ilə bağlı narahatlıqlar uzun illərdir mövcuddur. Yaxın Şərqdəki münaqişə və İranın bir sıra hərbi və siyasi liderlərinin öldürülməsindən sonra bu narahatlıqlar daha da artıb.