ABŞ-ın nəhəng raket qalxanı: İkinci "soyuq müharibə" başlayır

ABŞ-ın “Qızıl Günbəz” raketdən müdafiə proqramı yeni silahlanma yarışının başlanğıcı kimi qiymətləndirilib.

Publika.az xəbər verir ki, bu barədə Rusiya Mühəndislik Akademiyasının akademiki, pilotsuz aviasiya təlim mərkəzinin təsisçisi Maksim Kondratyev “Lenta.ru”ya açıqlamasında bildirib.

Onun sözlərinə görə, layihə Şimali Amerika qitəsini ballistik raketlər, digər raketlər və pilotsuz uçuş aparatlarından qorumaq üçün çoxsəviyyəli müdafiə sistemi yaratmağı nəzərdə tutur.

Kondratyev bildirib ki, sistem kosmosda, quruda, havada və dənizdə yerləşən çoxsaylı aşkarlama vasitələrini, həmçinin klassik raket əleyhinə sistemlərdən tutmuş kosmik lazerlərə qədər müxtəlif məhvetmə texnologiyalarını birləşdirəcək.

Akademik bu layihəni “soyuq müharibənin ikinci mərhələsi” adlandırıb və nüvə silahları ilə yanaşı, onlara qarşı müdafiə sistemlərinin də inkişaf etdiyini vurğulayıb.

Bununla belə, ekspert layihənin həyata keçirilməsi üçün böyük maliyyə və texnoloji imkanlar tələb olunduğunu, ABŞ-ın bəzi zəruri texnologiyalara hələ sahib olmadığını qeyd edib.

Qeyd edək ki, Pentaqon “Qızıl Günbəz” proqramı çərçivəsində ilk sınaqları bu ilin sonunadək başa çatdırmağı planlaşdırır. Bəzi kosmik sınaqların isə 2027 və 2028-ci illərdə keçirilməsi nəzərdə tutulur.