İkinci Dünya Müharibəsi memorialını təhqir edən qadın saxlanıldı - Onu 10 il həbs gözləyir

ABŞ-da İkinci Dünya Müharibəsi memorialında vandalizm törətməkdə şübhəli bilinən Melissa Farris saxlanılıb.

Publika.az xəbər verir ki, ABŞ prokurorluğu Vaşinqtonda yerləşən memorialda vandalizm törətməkdə şübhəli bilinən Farrisə qarşı ittiham irəli sürüb.

Kolumbiya dairəsinin prokuroru Cenin Pirro “X” sosial şəbəkəsində bildirib ki, qadını 10 ilədək həbs cəzası gözləyir.

Pirronun sözlərinə görə, iş federal məhkəməyə göndərilib. Farris dövlət əmlakına zərər vurmaqda və veteranların xatirəsinə ucaldılmış abidələri korlamaqda ittiham olunur. Prokuror sübut kimi memorial kompleksinə boya çəkilməsi prosesini əks etdirən fotoşəkilləri də paylaşıb.

Qeyd edək ki, hadisə paytaxtın "National Mall" adlanan milli park ərazisində baş verib. Şübhəli şəxs memorialın sütunlarına boya çəkib, həmçinin fəvvarənin hovuzuna təmizləyici vasitə əlavə edib. Nəticədə fəvvarədə çoxlu miqdarda köpük yaranıb.

Hadisəyə ABŞ Prezidenti Donald Tramp sərt reaksiya verib. Tramp "Truth Social" hesabında yazıb ki, II Dünya Müharibəsində həlak olan amerikalı qəhrəmanlara qarşı “daha böyük təhqir ola bilməz”.

Prezident vurğulayıb: "Biz bunu edənlərin izindəyik!"

Ləman