Mərkəzi Kəşfiyyat İdarəsində kütləvi istefa: Keçmiş əməkdaşlar aylarla pensiya gözləyir

ABŞ Mərkəzi Kəşfiyyat İdarəsində (CIA) son dövrlərin ən böyük əməkdaş axını yaşanır.

Publika.az xəbər verir ki, bu barədə "The Washington Post" keçmiş kəşfiyyat əməkdaşlarına və qurumun daxili məlumatlarına istinadən yazıb.

CIA-dan istefa verən və ya təqaüdə çıxan bəzi əməkdaşlara ilk tam pensiya ödənişinin işdən ayrıldıqdan sonra 9 ay və ya daha gec verilə biləcəyi bildirilib.

Qəzetin məlumatına görə, Donald Trampın ikinci prezidentlik müddətinin başlanmasından sonra CIA-dan yüzlərlə, hətta 1000-dən çox əməkdaş ayrılmış ola bilər. Dəqiq rəqəmlər məxfi saxlanılır. 2025-ci ilin əvvəlində qurumda təxminən 22 min əməkdaş çalışırdı.

Kütləvi ayrılmalar Tramp administrasiyasının federal aparatın ixtisarı siyasəti çərçivəsində baş verir. 2025-ci ilin mayında Ağ Ev Konqresə CIA-nın ştatının növbəti illərdə təxminən 1200 nəfər azaldılmasının planlaşdırıldığını bildirmişdi.

Məsələni daha da çətinləşdirən amillərdən biri pensiya sənədlərinin hazırlanmasına cavabdeh əməkdaşların da ixtisarlardan təsirlənməsidir. CIA bildirib ki, hazırda pensiya müraciətlərinin “misli görünməmiş” sayını emal edir və gecikmələri azaltmağa çalışır.

Keçmiş kəşfiyyat əməkdaşları isə gecikmələrin yalnız sosial problem olmadığını, əks-kəşfiyyat baxımından da risk yaratdığını düşünürlər. Onların fikrincə, maliyyə baxımından çətin vəziyyətə düşən və məxfi məlumatlara çıxışı olmuş keçmiş CIA əməkdaşları xarici xüsusi xidmətlərin hədəfinə çevrilə bilər.

Keçmiş əməkdaşlardan biri vəziyyəti belə qiymətləndirib: “Biz əks-kəşfiyyat üçün böyük risk yaradırıq.”

Müəllif: Adəm