ABŞ 200 minədək əcnəbinin vizasını ləğv etməyə hazırlaşır

ABŞ administrasiyası sığınacaq üçün müraciət etmiş və ya hazırda sığınacaq prosesi davam edən 200 minədək əcnəbinin biznes və turist vizalarını ləğv etməyə hazırlaşır.

Publika.az xəbər verir ki, bu barədə "Associated Press" məlumat yayıb.

ABŞ Dövlət Departamentinin sənədlərinə və amerikalı rəsmilərə istinadən bildirilir ki, yaxın həftələrdə 2016–2026-cı illər arasında verilmiş B1 və B2 vizalarının ləğvi ilə bağlı qərar açıqlana bilər. Bu, ABŞ tarixində vizaların ən böyük kütləvi ləğvi ola bilər.

Dövlət Departamentinin nümayəndəsi Tommi Piqott bildirib ki, ABŞ Daxili Təhlükəsizlik Nazirliyi ilə birlikdə ölkəyə qısamüddətli səfər məqsədilə daxil olduqdan sonra sığınacaq üçün müraciət edən şəxslər müəyyənləşdirilir və onların qeyri-immiqrasiya vizaları ləğv ediləcək.

Rəsmilərin sözlərinə görə, vizanın ləğvi həmin şəxslərin dərhal deportasiya ediləcəyi anlamına gəlmir. Hazırda sığınacaq müraciətləri araşdırılan şəxslərin əksəriyyətinin başqa hüquqi statusa keçirilməsi gözlənilir. Bununla belə, onlar biznes və turist səfərləri üçün nəzərdə tutulan əvvəlki viza statuslarını itirəcəklər.

"Associated Press"in məlumatına görə, plan həyata keçirilərsə, ABŞ-da vizaların ləğvi baxımından görünməmiş miqyaslı tədbir olacaq.