ABŞ İran və Rusiyaya qarşı “balyoz” hazırlayır - 100 faizlik rüsumlar gündəmdə

ABŞ Senatında Rusiya və İrana qarşı sanksiyaların sərtləşdirilməsini nəzərdə tutan qanun layihəsi ciddi iqtisadi təzyiq alətinə çevrilə bilər.

Publika.az xəbər verir ki, bu barədə "Reuters" məlumat yayıb.

Sənədin müəlliflərindən biri, demokrat senator Riçard Blumental layihəni Rusiyaya qarşı “balyoz” adlandırıb. Onun sözlərinə görə, Rusiya prezidenti Vladimir Putin yalnız gücü anlayır.

Qanun layihəsi ABŞ prezidentinə Rusiya nefti və qazının ən böyük beş idxalçısına qarşı 100 faizlik rüsum tətbiq etmək səlahiyyəti verəcək. Söhbətin Çin, Hindistan, bəzi Avropa ölkələri və Yaponiyadan gedə biləcəyi bildirilib.

Sənəddə həmçinin sanksiya siyahılarının genişləndirilməsi və Rusiya maliyyə institutları ilə əməliyyatlara məhdudiyyətlərin artırılması nəzərdə tutulur. Layihə artıq Senatda təsdiqlənib və Nümayəndələr Palatasında müzakirəyə çıxarılacaq.

Qəbul ediləcəyi təqdirdə, yeni paket son illərdə Rusiyaya qarşı tətbiq ediləcək ən sərt məhdudiyyətlərdən biri ola bilər. Xüsusilə Rusiya neftinin alıcılarına qarşı ikinci dərəcəli sanksiyaların tətbiqi Moskvanın enerji ixracına ciddi təzyiq yarada bilər.

Qeyd edək ki, 2025-ci ildə ABŞ artıq Rusiyanın “kölgə donanması”na və iri neft şirkətlərinə qarşı sanksiyalar tətbiq etmişdi. Yeni qanun layihəsi isə təzyiq mexanizmlərini daha da genişləndirir.

Senatda sənədə həm demokratlar, həm də respublikaçılar dəstək verib. Bu, Ukrayna və Yaxın Şərqdəki münaqişələr fonunda ABŞ xarici siyasətində nadir ikipartiyalı razılaşmalardan biri hesab olunur.

Moskva isə hələlik qanun layihəsinə münasibət bildirməyib.

Müəllif: Adəm