ABŞ çiplərə böyük rüsum hazırlayır: Texnologiya nəhəngləri təşvişdə

ABŞ prezidenti Donald Trampın administrasiyası yarımkeçiricilərə genişmiqyaslı gömrük rüsumları tətbiq etməyi nəzərdən keçirir.

Publika.az xəbər verir ki, bu barədə "Politico" səkkiz mənbəyə istinadən məlumat yayıb.

Müzakirə olunan tədbirlər yalnız çipləri deyil, noutbuklar, oyun konsolları və məlumat mərkəzləri üçün serverləri də əhatə edə bilər.

ABŞ-ın ticarət naziri Hovard Latnik xarici şirkətlərin rüsumlardan azad edilməsini onların ABŞ-da yarımkeçirici istehsalına investisiya qoyması ilə əlaqələndirməyi təklif edir. Məqsəd ölkə daxilində çip istehsalını artırmaqdır.

Məlumata görə, rüsumların mərhələli şəkildə tətbiqi nəzərdən keçirilir. Lakin planın yaxın həftələr və ya aylarda dəyişdirilə biləcəyi də istisna edilmir.

Texnologiya şirkətləri isə mümkün qərardan narahatdır. Onlar xəbərdarlıq edirlər ki, belə addım ABŞ-ın süni intellekt sahəsində liderliyini risk altına ata bilər.

Xatırladaq ki, ABŞ 2025-ci ildə Çin istehsalı olan yarımkeçiricilərə və onların istehsalı üçün avadanlıqlara artıq rüsum tətbiq etmişdi. Bundan əvvəl, 2024-cü ildə Co Bayden administrasiyası çip istehsalçılarına milyardlarla dollar subsidiya nəzərdə tutan "CHIPS" qanununu qəbul etmişdi. Tramp isə subsidiyaların əvəzinə rüsumlardan istifadə edilməsini müdafiə edib.

Müəllif: Adəm