Pentaqon Avropaya “sürpriz” hazırlayır: ABŞ qoşunları geri çəkilə bilər

ABŞ Avropadakı hərbi qüvvələrinin bir hissəsini geri çəkməyi nəzərdən keçirir.

Publika.az xəbər verir ki, bu barədə “Financial Times” məlumat yayıb.

Bildirilir ki, Pentaqon Avropa ölkələrinin müdafiə imkanlarını kifayət qədər sürətlə artırmamasından narazıdır.

Pentaqonun siyasi məsələlər üzrə rəhbəri Elbric Kolbi NATO ölkələrinin səfirləri ilə görüşdə Avropanı müdafiə xərclərini artırmağa və silah alışını sürətləndirməyə çağırıb. O, Almaniya, Polşa və Niderlandın müdafiə xərclərini artırmasını müsbət qiymətləndirib, Böyük Britaniyanın isə daha çox səy göstərməli olduğunu bildirib.

Məlumata görə, Pentaqon ABŞ hərbi qüvvələrinin Avropadakı yerləşdirilməsi ilə bağlı araşdırmanı dekabrda başa çatdıracaq. Bununla bağlı artıq dörd variant hazırlanıb və yekun qərarın müdafiə naziri Pit Heqsetə təqdim ediləcəyi gözlənilir.

Avropalı rəsmilər Vaşinqtonun müdafiə xərclərini artırmaq tələblərinə əməl etməyən ölkələrdən ABŞ qoşunlarının bir hissəsini çıxara biləcəyindən narahatdırlar.

Tramp administrasiyası NATO müttəfiqlərindən həm müdafiə xərclərini artırmağı, həm də ABŞ-ın xarici siyasət kursuna daha açıq dəstək verməyi tələb edir. Bu tələblər yerinə yetirilməsə, ABŞ-ın Avropadakı hərbi mövcudluğunun azaldılması gündəmə gələ bilər.

Müəllif: Adəm