ABŞ kartellərə qarşı lazer silahından istifadə etdi - 3 PUA vuruldu

ABŞ hərbçiləri Texas ştatının cənubunda, Rio-Qrande çayı vadisində Meksika narkokartelinə məxsus olduğu bildirilən üç pilotsuz uçuş aparatını (PUA) yüksək enerjili çoxməqsədli lazer sistemi ilə vurub.

Publika.az xəbər verir ki, bu barədə “Reuters” mənbələrə istinadən məlumat yayıb.

Bildirilir ki, hərbçilər PUA-ların ABŞ hərbçiləri və Gömrük və Sərhəd Mühafizəsi əməkdaşları üçün “fiziki təhlükə” yaratdığını bildiriblər.

Qeyd olunur ki, Meksika narkokartelləri insan qaçaqmalçılığında və ABŞ hüquq-mühafizə əməkdaşlarının müşahidəsində PUA-lardan getdikcə daha çox istifadə edir. ABŞ hərbçiləri lazer zərbələrinin sərhədin hansı tərəfində endirildiyini açıqlamayıb.

Məlumata görə, ABŞ daha əvvəl də Meksika kartellərinə aid olduğu düşünülən PUA-lara qarşı Pentaqonun məxfi lazer sistemindən istifadə edib. Lakin sonradan həmin uçan obyektlərin böyük ehtimalla hava şarları olduğu üzə çıxıb. Həmin lazer sisteminin xaricdə sınaqdan keçirilən eksperimental silah olduğu və kommersiya aviasiyası üçün ciddi təhlükə yarada biləcəyi bildirilib.

Müəllif: Adəm