ABŞ məhkəməsindən Pentaqona zərbə: Bu qərar konstitusiyaya zidd sayıldı

ABŞ məhkəməsi Pentaqonun süni intellekt şirkəti "Anthropic"i tədarük zənciri üçün risk yaradan şirkətlər siyahısına daxil etməsini Konstitusiyaya zidd hesab edib.

Publika.az xəbər verir ki, bu barədə “The Verge” yazıb. Qərarı Kaliforniyanın Şimal Dairəsi üzrə federal məhkəmənin hakimi Rita Lin çıxarıb.

Məhkəmə prosesi "Anthropic"in öz süni intellekt sistemlərinin ABŞ hərbçiləri tərəfindən istifadəsinə tətbiq etdiyi məhdudiyyətləri aradan qaldırmaqdan imtina etməsindən sonra başlayıb. Şirkət texnologiyalarının amerikalıların kütləvi şəkildə izlənilməsi və insan müdaxiləsi olmadan hədəfləri seçib məhv edə bilən avtonom silahların hazırlanması üçün istifadəsinə qarşı çıxıb.

Hakim bildirib ki, milli təhlükəsizlik arqumenti hakimiyyətə hökuməti tənqid edən şəxsləri cəzalandırmaq hüququ vermir. Onun sözlərinə görə, Pentaqonun addımı ABŞ Konstitusiyasının Birinci Düzəlişini pozan “qanunsuz cavab tədbiri” olub.

Münaqişə Pentaqonun süni intellekt şirkətlərindən texnologiyalarının bütün qanuni məqsədlər üçün istifadəsinə razılıq verməsini tələb etməsindən sonra daha da kəskinləşib. Əksər şirkətlər yeni şərtləri qəbul etsə də, "Anthropic" iki məhdudiyyəti qoruyub saxlayıb.

Bundan sonra Pentaqon "Anthropic"i tədarük zənciri üçün risk yaradan təchizatçı elan edib. Daha sonra qurum “Google”, “Microsoft”, “OpenAI” və “SpaceX” də daxil olmaqla digər süni intellekt şirkətləri ilə müqavilələr bağlayıb.

"Anthropic" məsələ ilə bağlı məhkəməyə müraciət edib. Hakim Rita Lin mart ayında Pentaqonun qərarının icrasını müvəqqəti dayandıraraq hökumətin şirkəti hərbi müqavilələrlə bağlı mövqeyini açıq şəkildə tənqid etdiyinə görə cəzalandırdığını bildirib.