Amerikalılara ŞOK XƏBƏRDARLIQ - Aclıq olacaq

Amerikanın Hartlend İnstitutunun analitiki Ceff Stayr mineral gübrələrin çatışmazlığı səbəbindən ABŞ-da ərzaq böhranının yaranması riskləri barədə xəbərdarlıq edib.

Publika.az xəbər verir ki, o, bu barədə “The Wall Street Journal” üçün yazdığı məqalədə qeyd edib.

Ekspertin fikrincə, gübrə bazarında Çin, Rusiya və İranın üstünlük təşkil etməsi ərzaq məhsullarının pərakəndə qiymətlərinin kəskin artması üçün zəmin yaradır. Stayr bildirir ki, vəziyyəti bir sıra amillər daha da çətinləşdirir: Ukrayna ətrafında mövcud geosiyasi gərginlik, Çindən gübrə ixracına tətbiq olunan məhdudiyyətlər, eləcə də Hörmüz boğazında gəmiçiliyin azadlığına yaranan təhdidlər.

Müəllif ABŞ hakimiyyətini milli istehsal zəncirlərinin gücləndirilməsinə və ölkə daxilində karbohidrogen hasilatının intensivləşdirilməsinə diqqət yetirməyə çağırır. O vurğulayır ki, təbii qaz azot gübrələrinin istehsalı üçün əsas komponentdir, neft-qaz emalı isə fosfat məhsullarının hazırlanması üçün zəruri həcmdə kükürd əldə etməyə imkan verir.

Stayr dövlətin enerji müstəqilliyi ilə ərzaq təhlükəsizliyini təmin etmək qabiliyyəti arasında ayrılmaz əlaqənin olduğunu bildirib.

Hüseyn İbadlı