PUA-ları raketsiz məhv edəcək: ABŞ ordusundan yeni silah

ABŞ Ordusu pilotsuz uçuş aparatlarına qarşı istifadə olunacaq yüksək enerjili lazer silahlarının istehsalı üçün “AeroVironment” (AV) şirkəti ilə ilk müqaviləni imzalayıb.

Publika.az xəbər verir ki, bu, ABŞ ordusunun istiqamətləndirilmiş enerji silahlarının seriya istehsalına keçidi baxımından mühüm addım hesab olunur.

Müqavilə yüksək güclü davamlı döyüş lazeri (E-HEL) proqramı çərçivəsində bağlanıb. Sistem əsasən PUA-ların məhv edilməsi üçün nəzərdə tutulub.

ABŞ Ordusunun Baş Qərargah rəisinin müavini, general Kristofer La Neve bildirib ki, istiqamətləndirilmiş enerji texnologiyasına əsaslanan bu proqram hərbi bölmələrə pilotsuz sistemlərə qarşı daha effektiv mübarizə aparmağa imkan verəcək.

E-HEL-in əsas üstünlüklərindən biri PUA-ların raketlərlə müqayisədə daha aşağı xərclə zərərsizləşdirilməsidir. Elektrik enerjisi ilə işləyən sistem yüksək enerjili lazer şüası formalaşdırır və hər atışın maya dəyərinin aşağı olması ilə seçilir. Sistemin stasionar bazalarda, yarıstasionar taktiki mövqelərdə, eləcə də mobil döyüş maşınlarında yerləşdirilməsi nəzərdə tutulur.