ABŞ-dan dronlarla bağlı ŞOK QƏRAR: İdxala 100%-dək rüsum tətbiq edildi

ABŞ-da pilotsuz uçuş aparatlarının və bəzi komponentlərinin idxalına əlavə gömrük rüsumları qüvvəyə minib.

Publika.az xəbər verir ki, yeni tariflər 10%-dən 100%-ə qədər dəyişir.

Maksimum rüsum çəkisi 25 kiloqramdan çox olan dronlara, eləcə də termal görüntüləmə kameraları ilə təchiz edilmiş pilotsuz uçuş aparatlarına tətbiq olunur.

Donald Tramp administrasiyası bu qərarı ABŞ-ın Çindən asılılığını azaltmaq və yerli istehsalı gücləndirmək məqsədi ilə izah edir. Çünki ölkədə istifadə olunan dronların əhəmiyyətli hissəsi Çində istehsal olunur.

Ağır və termal kameralarla təchiz edilmiş dronlardan polis və xilasetmə xidmətlərində, itkin şəxslərin axtarışında, həmçinin meşə yanğınlarının monitorinqində istifadə edilir.

Qərarı tənqid edənlər isə bildirirlər ki, ABŞ istehsalçıları hazırda daxili tələbatı tam qarşılamaq iqtidarında deyil. Onların fikrincə, yüksək rüsumlar nəticədə dronların qiymətinin artmasına səbəb olacaq və bu addım faktiki olaraq yerli istehsalçıları xarici rəqiblərdən qoruyacaq.

Adəm