ABŞ məhkəməsi Tramp administrasiyasının yeni viza qaydalarını blokladı

ABŞ-ın Massaçusets ştatının federal dairə məhkəməsi Tramp administrasiyasının əcnəbi tələbələr, mübadilə proqramı iştirakçıları və jurnalistlərin ölkədə qalma müddətini məhdudlaşdıran yeni qaydalarının tətbiqini bloklayıb.

Publika.az xəbər verir ki, hakim ABŞ Daxili Təhlükəsizlik Nazirliyinin qaydaların dəyişdirilməsi ilə bağlı əsaslandırmasını kifayət qədər əsaslı hesab etməyib.

Qərara əsasən, yeni qaydaların tətbiqi məhkəmə prosesi yekunlaşana qədər dayandırılacaq.

ABŞ-da hazırda təxminən 1,6 milyon F vizası olan tələbə və 500 min J vizası sahibi var. Hakim bildirib ki, dəyişikliklər Massaçusets Texnologiya İnstitutu və Harvard Universiteti də daxil olmaqla aparıcı tədqiqat universitetlərinin fəaliyyətinə mənfi təsir göstərə bilər.

Daxili Təhlükəsizlik Nazirliyinin iyulda qəbul etdiyi qaydalara əsasən, F vizalarının müddəti 4 il, J vizası ilə ölkədə qalma müddəti isə 4 il ilə məhdudlaşdırılmalı idi. I vizası olan xarici jurnalistlər üçün isə bu müddətin 240 gün olması nəzərdə tutulurdu.