Trampın sərvəti açıqlandı: Görün əsas gəlir mənbəyi nədir

ABŞ prezidenti Donald Trampın sərvəti hazırda təxminən 7 milyard dollar qiymətləndirilir.

Publika.az xəbər verir ki, “Forbes”in hesablamasına görə, bu, onun 2024-cü ildə prezident seçkilərində qalib gəldiyi vaxtkı sərvətindən 2,7 milyard dollar çoxdur. Bununla belə, son bir ildə Trampın sərvəti təxminən 300 milyon dollar azalıb.

Sərvətin Ağ Evə qayıtdıqdan sonra sürətlə artmasında əsas rolu kriptovalyuta layihələri və xaricdəki biznes sövdələşmələri oynayıb.

Məlumata görə, Trampın sərvətinin təxminən 2,4 milyard dolları kriptovalyuta və likvid aktivlərdən ibarətdir. Bunun 1,9 milyard dolları likvid vəsaitlərin payına düşür. Bundan başqa, Trampın memkoinlərinin dəyəri təxminən 183 milyon dollar, "World Liberty Financial" kriptolayihəsindəki payı 78 milyon dollar, bu layihə ilə əlaqəli "USD1 stabilkoin" biznesindəki payı isə 233 milyon dollar qiymətləndirilir.

Trampın sərvətində ikinci böyük payı qolf klubları və kurortlar tutur. Onların ümumi dəyəri təxminən 1,8 milyard dollardır. Buraya ABŞ-dakı 10 qolf klubu, Floridadakı "Mar-a-Laqo" kurortu, "Trump National Doral Miami" və Avropadakı üç obyekt daxildir. "Mar-a-Laqo"nun dəyəri 650 milyon dollar, "Trump National Doral"dakı Trampa məxsus pay isə borclar çıxıldıqdan sonra təxminən 365 milyon dollar hesablanır.

Daha 1,1 milyard dollar Trampın daşınmaz əmlak investisiyalarının payına düşür. Buraya Nyu-York və San-Fransiskodakı ofis və ticarət komplekslərindəki paylar, "Trump Tower", Floridadakı yaşayış obyektləri və digər əmlaklar daxildir.

Trampın "Trump Media & Technology Group" şirkətindəki payının dəyəri təxminən 1 milyard dollar qiymətləndirilir. Şirkət "Truth Social" sosial şəbəkəsinə sahibdir.

“Forbes”in məlumatına görə, şirkətin maliyyə göstəriciləri zəif olaraq qalır: 2025-ci ildə gəliri cəmi 3,7 milyon dollar, xalis zərəri isə 712 milyon dollar olub. Şirkətin səhmlərinin son bir ildə ucuzlaşması Trampın sərvətinin azalmasına səbəb olan əsas amillərdən biri kimi göstərilir.

Digər aktivlərinin dəyəri isə təxminən 700 milyon dollar təşkil edir. Bunun 655 milyon dolları onun lisenziyalaşdırma və idarəetmə biznesinin payına düşür. Trampın digər aktivləri arasında təyyarə, helikopter, pensiya vəsaitləri və müxtəlif investisiyalar da var.

“Forbes” hesablamasında təxminən 140 milyon dollar əlavə öhdəlik də nəzərə alınıb. Bunun 94 milyon dolları hüquqi öhdəliklər, təxminən 50 milyon dolları isə aktivlər təminatı ilə götürülmüş kredit xəttidir.

Beləliklə, son bir ildə sərvəti 300 milyon dollar azalsa da, Trampın hazırkı 7 milyard dollarlıq sərvəti 2024-cü il seçkilərindəki qələbəsindən əvvəlki göstəricidən 2,7 milyard dollar yüksəkdir.

Müəllif: Adəm Abbaslı