Britaniya Maskın paylaşımlarını izləyib: Milli təhlükəsizlik yoxlanışı

Böyük Britaniya hakimiyyəti amerikalı milyarder İlon Maskın "X" platformasında etdiyi paylaşımları milli təhlükəsizliyə mümkün təhdidlər baxımından izləyib və onun xarici dövlətlərlə əlaqələrinin olub-olmadığını araşdırıb.

Publika.az xəbər verir ki, bu barədə “The Wall Street Journal” məlumat yayıb.

Məlumata görə, son 4,5 il ərzində heç bir ölkə Maskın fəaliyyətinə Böyük Britaniya qədər diqqət ayırmayıb. Milyarder mütəmadi olaraq miqrasiya fonunda ölkənin milli kimliyini itirdiyini bildirir, hətta Böyük Britaniyada vətəndaş müharibəsinin qaçılmaz olduğunu yazır.

Mask eyni zamanda "X" platforması vasitəsilə miqrasiya əleyhinə “Restore Britain” partiyasına və onun lideri Rupert Louya dəstək verir. Məlumata görə, bu dəstək az tanınan siyasətçinin tanınmasını artırıb və partiyanın sorğularda təxminən 5 faiz dəstək qazanmasına təsir edib.

Milyarder Rupert Louyu açıq şəkildə Böyük Britaniyanın gələcək lideri adlandırıb. Bu isə London rəsmilərinin narahatlığını artırıb.

Bununla belə, Britaniya hakimiyyəti Maskın fəaliyyətinə qarşı rəsmi addım atmağa tələsməyib. Nəşrin yazdığına görə, London ABŞ Prezidenti Donald Tramp administrasiyası ilə birbaşa qarşıdurmadan çəkinib.

Müəllif: Adəm