Afrikadakı ABŞ PUA-ları geri çəkilir: “Reaper”lərin yeni ünvanı bəlli oldu

Pentaqon zərbə-kəşfiyyat imkanlarına malik MQ-9 “Reaper” pilotsuz uçuş aparatlarının əsas hissəsini Afrika Komandanlığının məsuliyyət zonasından ABŞ-ın Cənub Komandanlığının ərazisinə keçirməyi planlaşdırır.

Publika.az CNN-ə istinadən xəbər verir ki, bu addım Vaşinqtonun Latın Amerikası regionunda narkokartellərə və terror qruplaşmalarına qarşı yeni əməliyyatlara hazırlığı ilə əlaqələndirilir.

Pilotsuz uçuş aparatlarının dəqiq sayı açıqlanmasa da, mənbələr Afrikadakı “Reaper”lərin böyük əksəriyyətinin bölgədən çıxarıla biləcəyini bildiriblər. Onların mümkün istifadə məkanlarından biri Ekvadordur. Artıq burada ABŞ hərbi mütəxəssisləri yerli təhlükəsizlik qüvvələri ilə birgə fəaliyyət göstərirlər.

Bununla belə, çıxarılan PUA-ların hamısının Latın Amerikasına göndərilməsi planlaşdırılmır. Məlumata görə, PUA-ların bir hissəsi İranla silahlı qarşıdurmanın kəskinləşməsi fonunda Pentaqonun itkilərdən sonra azalan arsenalını bərpa etmək üçün təcili şəkildə Yaxın Şərqə göndərilə bilər.

Müəllif: Adəm