Tramp məhkəməyə verildi - Ağ Evdə girişlər onların üzünə bağlandı

ABŞ-ın CNN, MSNOW və "Politico" media qurumları jurnalistlərinin Ağ Evdə akkreditasiyasının ləğv edilməsindən sonra Donald Tramp administrasiyasını məhkəməyə verib.

Publika.az xəbər verir ki, bu barədə üç media qurumunun yaydığı birgə bəyanatda bildirilib.

Qeyd edilib ki, hökumətə qarşı iddia ABŞ Konstitusiyasının Birinci Düzəlişi ilə təmin olunan hüquqların müdafiəsi və mətbuatın fəaliyyətinə hakimiyyət müdaxiləsinin qarşısının alınması məqsədi daşıyır.

ABŞ prezidenti Donald Tramp sentyabrın 18-də CNN, MSNOW və "Politico"nun Ağ Evdə fəaliyyətinə qadağa qoyub. O, sözügedən media qurumlarını “saxta xəbərlər” yaymaqda ittiham edib. Ertəsi gün isə həmin nəşrlərin jurnalistlərinin Ağ Ev kompleksinə girişinə icazə verilməyib, onların vəsiqələri deaktiv edilib və ya geri alınıb.

CNN, MSNOW və "Politico"nun məlumatına görə, Ağ Ev jurnalistlərin akkreditasiyasını əvvəlcədən xəbərdarlıq etmədən və müvafiq prosedurlara əməl etmədən ləğv edib. Media qurumları hesab edir ki, qərarın onların yayımladığı materiallardan narazılıqla əlaqələndirilməsi mətbuat azadlığı ilə bağlı ciddi suallar yaradır.

Müəllif: Adəm