Trampın media qadağasına zərbə: Məhkəmə “CNN” və “Politico”nu Ağ Evə qaytardı

ABŞ-da federal məhkəmə prezident Donald Trampın “CNN”, “MSNOW” və “Politico” jurnalistlərinin Ağ Evə girişinə qoyduğu qadağanı dayandırıb.

Publika.az "Reuters"ə istinadən xəbər verir ki, hakim qadağanın ABŞ Konstitusiyasını pozduğunu bildirib.

Qeyd edək ki, Tramp sözügedən üç media qurumunun Ağ Evə girişini qadağan etmişdi. Prezident onları “saxta xəbərlər” yaymaqda ittiham edib. Bundan sonra “CNN”, “MSNOW” və “Politico” ABŞ administrasiyasını məhkəməyə verərək bunun Konstitusiyanın söz azadlığını qoruyan Birinci Düzəlişinə zidd olduğunu bildiriblər.

ABŞ Ədliyyə Nazirliyi isə Trampın media nümayəndələrinin Ağ Evə girişinə öz mülahizəsinə əsasən icazə verməmək hüququnun olduğunu müdafiə edib. Nazirlik bu mövqeyini milli təhlükəsizlik məsələləri ilə də əlaqələndirib.

Məhkəmənin qərarına əsasən, qadağa işə mahiyyəti üzrə baxılana qədər qüvvədə olmayacaq. Jurnalistlərin Ağ Evə girişinin konkret nə vaxt bərpa ediləcəyi açıqlanmayıb.

Ağ Ev nümayəndələri qərarla bağlı hələlik şərh verməyiblər. Bundan əvvəl Tramp Ağ Evə girişinə məhdudiyyət qoyulan media qurumlarının siyahısının genişləndirilə biləcəyini demişdi. O, həmçinin qərarını ləğv edə biləcəyini də istisna etməmişdi.

Xatırladaq ki, Ağ Ev Müxbirlər Assosiasiyası da jurnalistlərə tətbiq olunan məhdudiyyətlərə dəfələrlə etiraz edib.

Müəllif: Adəm Abbaslı