Trampdan inqilabi fərman - Süni intellekt belə adlandırılacaq

ABŞ Prezidenti Donald Tramp federal hökumətin terminologiyasında “süni intellekt” (Sİ) anlayışının əvəzinə “superintellekt” termininin istifadə edilməsini nəzərdə tutan fərman imzalayıb.

Publika.az xəbər verir ki, bu barədə Ağ Evin mətbuat xidməti məlumat yayıb.

Fərmana əsasən, federal qurumlar tərəfindən istifadə olunan terminologiya texnologiyaların imkanlarını və onların inkişaf perspektivlərini əks etdirməlidir. Sənəddə bildirilir ki, “superintellekt” termini müvafiq texnologiyaların potensialını və sürətlə genişlənən imkanlarını daha dəqiq səciyyələndirir.

Amerika dövlət qurumlarına və digər hökumət strukturlarına qanunvericiliyin yol verdiyi qədər rəsmi yazışmalarda “superintellekt” ifadəsindən istifadə etmək tapşırılıb. Bu termin ictimai mesajlarda, veb-saytlarda, məruzələrdə və qanunvericilik aktı olmayan digər sənədlərdə istifadə olunacaq.

Bununla belə, fərman “süni intellekt” termininin artıq istifadə olunduğu qüvvədə olan normativ aktlara dəyişikliklər edilməsini nəzərdə tutmur.

Sentyabrda Tramp “süni intellekt” terminini bəyənmədiyini bildirmiş və üç alternativ ad təklif etmişdi: “ali intellekt”, “ekstremal intellekt” və ya “superintellekt”. Dövlət başçısının fikrincə, bu variantlar sürətlə inkişaf edən texnoloji inqilabı daha yaxşı təsvir edir.

Hüseyn İbadlı