ABŞ Venesuelada hərbi baza yarada bilər

ABŞ Prezidenti Donald Tramp Venesuelada Amerika hərbi bazasının yaradılması imkanını istisna etməyib.

Publika.az xəbər verir ki, onun sözlərindən “RİA Novosti” sitat gətirib.

“Biz müxtəlif işlər görmək imkanını nəzərdən keçiririk. Bildiyiniz kimi, bizim Venesuela ilə çox yaxşı münasibətlərimiz var”, – Tramp müvafiq suala cavab verərkən bildirib.

Yanvarın 3-də ABŞ Venesuelaya zərbə endirib: ölkənin paytaxtı Karakasda və Fort-Tiuna hərbi bazasında partlayışlar baş verib. Hücumlardan sonra Tramp əməliyyatı uğurlu adlandırıb və ABŞ hərbçilərinin Venesuela Prezidenti Nikolas Maduronu və onun həyat yoldaşını ələ keçirdiklərini bəyan edib. Ağ Evin rəhbəri Maduronun “artıq prezident olmadığını” və Venesuelanın idarəçiliyinin “hakimiyyət təhvil verilənə qədər” ABŞ tərəfindən öz üzərinə götürüldüyünü vurğulayıb.

Mart ayında Tramp Venesuelanın səlahiyyətli prezidenti Delsi Rodrigesin hökumətini rəsmən tanıyıb. Ağ Evin rəhbəri Rodriges ilə çox yaxşı münasibətlərə malik olduğunu bəyan edib.

Hüseyn İbadlı