Trampın kürəkəninə qarşı məhkəmə iddiası: Gizlətdiyi nədir?

ABŞ-da tanınmış ictimai təşkilat prezident Donald Trampın kürəkəni Cared Kuşnerin xüsusi elçi kimi fəaliyyətinə mane olmaq üçün məhkəməyə müraciət edib. Təşkilat onun şəxsi maliyyə məlumatlarını açıqlamadığını və mümkün maraqlar toqquşması riskinin olduğunu bildirir.

Publika.az xəbər verir ki, bu barədə “Vaşinqtonda Məsuliyyət və Etika Uğrunda Vətəndaşlar” (CREW) təşkilatı məlumat yayıb.

Təşkilat hesab edir ki, ABŞ-ın xarici siyasəti ilə bağlı mühüm danışıqlarda əsas rol oynayan Kuşner rəsmi dövlət qulluqçusu hesab edilməli, gəlirləri barədə müvafiq bəyannamələri təqdim etməlidir. CREW məhkəmədən onun bu vəzifəni icra etməsinin qarşısının alınmasını və maliyyə məlumatlarını açıqlamasını tələb edir.

İddiaçıların sözlərinə görə, Kuşner ABŞ-İran, Rusiya-Ukrayna müharibələrinin, eləcə də Yaxın Şərqdəki münaqişələrin həlli istiqamətində diplomatik fəaliyyət göstərir.

Bununla yanaşı, o, idarə etdiyi “Affinity Partners” investisiya şirkətinə də rəhbərlik edir. Şirkətin idarə etdiyi aktivlərin həcmi 6 milyard dolları ötür və onların təxminən 99 faizi Səudiyyə Ərəbistanı, Qətər və Birləşmiş Ərəb Əmirliklərinin suveren fondları da daxil olmaqla, xarici investorlara məxsusdur.

CREW prezidenti Donald Şerman bildirib ki, Kuşner qanunlardan üstün deyil və maliyyə fəaliyyətinin şəffaflığını təmin etməlidir.

Müəllif: Adəm