Obama Trampı yenə hədəfə aldı: Ağ Ev və restoran qalmaqalı böyüyür

ABŞ-ın keçmiş prezidenti Barak Obama ölkənin hazırkı lideri Donald Trampın tənqid etdiyi məşhur Amerika restoranı ilə bağlı zarafatını izah edib.

Publika.az xəbər verir ki, Obama Corciya ştatında demokratların mitinqində çıxışı zamanı “İki qız atasıyam. Sizcə, mən onların uşaqlığını Cheesecake Factory-yə getmədən keçirə bilərdim? Bu, on il ərzində ən çox sevdiyim mövzulardan biri olub”, - deyə bildirib.

Onun sözlərinə görə, hazırkı administrasiya cavabında yalnız restoranla bağlı şərhinə diqqət yetirib, qiymət artımı ilə bağlı fikirlərini isə nəzərə almayıb.

Xatırladaq ki, Obama daha əvvəl demokratların seçkiqabağı mitinqində Trampın Ağ Evdə apardığı yenidənqurma işlərini tənqid edərək bunun “Səddam Hüseynin Cheesecake Factory açmasına” bənzədiyini demişdi.

Buna cavab olaraq Tramp bu müqayisənin Obamanın siyasi səviyyəsini əks etdirdiyini bildirib və belə insanların təmizlə çirkini ayırd edə bilmədiklərini vurğulayıb. Mühafizəkar KİV-lərdə isə Obamanın ümumiyyətlə ABŞ biznesini dəstəkləyib-dəstəkləmədiyinə dair şübhələr ifadə olunub.

Müəllif: Valeh