Trampın prezidentlik planları: Qarşıda iki il var, bəs sonra?

ABŞ Prezidenti Donald Tramp qüvvədə olan qanunvericilik normaları buna icazə versəydi, yenidən ölkənin ən yüksək dövlət vəzifəsinə namizədliyini irəli sürməyə etiraz etməyəcəyini bildirib.

Publika.az xəbər verir ki, o, “New York Post” nəşrinin “Pod Force One” podkastında ABŞ Konstitusiyasına 22-ci düzəlişin müddəalarının sərtliyini vurğulayıb. Məhz bu düzəliş prezidentlik müddətini iki dövrlə məhdudlaşdırır.

Bununla yanaşı, Ağ Evin rəhbəri qarşıda onun səlahiyyət müddətinin hələ iki ili qaldığını xatırladıb. Onun sözlərinə görə, bu müddət ərzində bir çox təşəbbüsü həyata keçirmək mümkündür.

Qanunvericiliyə əsasən, Trampın ikinci prezidentlik müddəti 2029-cu ilin yanvarında başa çatacaq. 1951-ci ildə qəbul edilmiş 22-ci düzəliş prezident vəzifəsində iki müddətdən artıq qalmağa məhdudiyyət qoyur. Bununla belə, Tramp üçüncü müddətə namizədliyini irəli sürmək imkanını dəfələrlə gündəmə gətirib.

Xatırladaq ki, Tramp 2024-cü ilin noyabrında keçirilən prezident seçkilərində Demokratlar Partiyasının namizədi Kamala Harrisi qabaqlayaraq qələbə qazanıb. O, daha əvvəl 2017–2021-ci illərdə ölkəyə rəhbərlik edib.

Hüseyn İbadlı