ABŞ-da Hellouin dəhşəti: onlarla insan güllələndi

ABŞ-da Hellouin bayramı ilə bağlı keçirilən tədbirlər zamanı ölkənin müxtəlif bölgələrində baş verən atışmalar nəticəsində azı 13 nəfər ölüb, 92 nəfər yaralanıb.

Publika.az xəbər verir ki, ən ağır hadisə Texas ştatının Dallas şəhərində qeydə alınıb. Burada üç ayrı atışma nəticəsində dörd nəfər ölüb, azı 15 nəfər yaralanıb.

Florida ştatının Ceksonvill şəhərində iki atışma iki nəfərin ölümü, 11 nəfərin yaralanması ilə nəticələnib. Missisipi ştatının Cekson şəhərində gecə klubunda baş verən atışmada iki nəfər öldürülüb, dörd nəfər yaralanıb. Alabama ştatının Birmingem şəhərində isə stadion yaxınlığındakı silahlı insidentlərdə bir nəfər ölüb, səkkiz nəfər xəsarət alıb.

Delaver ştatında iki ayrı atışma zamanı bir nəfər ölüb, azı 15 nəfər yaralanıb. İllinoys ştatının Bluminqton şəhərində bir qadın həyatını itirib, daha yeddi nəfər yaralanıb. Kaliforniya və Miçiqan ştatlarında da Hellouin mağazalarında və əyləncə məkanlarında baş verən atışmalar ölüm və xəsarətlərlə nəticələnib.

CNN-in ilkin hesablamalarına əsasən, bu rəqəmlər tam siyahını əhatə etmir. Hadisələrlə bağlı araşdırmalar davam edir.