Məşhur tədqiqatçı “Azad qadın” heykəlindən yazdı - “Azərbaycan kimi olun”

"Bakıda son günüm. “Azad qadın” və ya “Örtüyünü açan qadın” abidəsini ziyarət etdim".

Publika.az xəbər verir ki, bunu müharibə üzrə tədqiqatçı, Madison Siyasət Forumunda Müharibə Araşdırmaları Mərkəzinin rəhbəri Con Spenser "X" hesabında yazıb.

O bildirib ki, Azərbaycana Qərbdən gələn bir qonaq kimi burada insanı təəccübləndirən çox şeylə qarşılaşıb:

"Bunlardan biri əhalisinin əksəriyyəti müsəlman olan ölkənin dünyəvi xarakteridir. Burada qadınlardan saçlarını örtmək tələb olunmur, onlar istədikləri kimi geyinə, dövlət orqanlarında çalışa və cəmiyyətin bütün sahələrində karyera qura bilərlər.

Bakının mərkəzində “Azad qadın” abidəsi, başqa sözlə, azadlığa qovuşmuş qadın heykəli ucalır. Heykəldə qadının baş örtüyünü çıxarması təsvir olunub. 1960-cı ildə ucaldılan bu abidə Azərbaycan qadınlarının azadlığa qovuşmasını, örtükdən imtina etmək, təhsil almaq və ictimai həyatda iştirak etmək hüququnu simvolizə edir.

Bu tarix bu gün də öz aktuallığını qoruyur. Azərbaycan bu yaxınlarda uzun illərdir davam edən dünyəvilik ənənəsini qorumaq məqsədilə məktəbli forması ilə bağlı qaydaları sərtləşdirərək dövlət məktəblərində hicabın istifadəsini məhdudlaşdırıb. Bəzi KİV-lərin iddia etdiyi kimi, bu, hicabın ölkə miqyasında qadağan edilməsi deyil, məktəblərdə geyim qaydalarına qoyulan məhdudiyyətdir. Qadınlar məktəbdən kənarda hicab taxa bilərlər.

Bu mənzərənin, xüsusilə qadınların azadlıqları, o cümlədən öz xarici görünüşləri və həyatları üzərində sərəncam vermək hüquqları baxımından qonşu İranla müqayisədə yaratdığı kəskin fərq diqqətimi cəlb edir.

İranda 22 yaşlı Məhsa Əmini 2022-ci ilin sentyabrında hicab qaydalarını pozmaqda ittiham edilərək əxlaq polisi tərəfindən saxlanıldıqdan və həbsdə olarkən döyülərək öldürüldükdən sonra həyatını itirdi. Onun hekayəsi İranın İslam rejiminin öz cəmiyyətinə qarşı törətdiyi çoxsaylı insan hüquqları pozuntularından yalnız biridir. Bu pozuntulara qətllər, işgəncələr, cinsi zorakılıq, qadınların təqib edilməsi və etirazçıların pulemyotlardan atəş açılaraq kütləvi şəkildə güllələnməsi daxildir.

Azərbaycan kimi olun".